Ny smak av tradisjon

Utgangspunktet for denne store satsinga på lokal mjølke-foredling var todelt. Både eit ønske om å ta vare på dei rike tradisjonane i mjølkeforedling frå det gamle seterlivet, og eit ønske om å utvikle garden basert på lokale ressursar.

Vidareføring av tradisjon
Kunnskap frå dei gamle budeiene om tradisjonsprodukta kjuke (pultost), rømme og smør og koking av gubb, prim og brunost, var utgangspunktet. Budeier frå både Lesja og Dovre har vorte rådspurt, jfr. semesteroppgåva om surmjølksostar som Åse skreiv i samband med fullføring av Matkulturstudiet (Vestnorsk Kulturakademi / Universitetet i Bergen, 2003-2004). Det var også ei stor glede for oss at siste budeia på Avdemssetra, Ruth Jørstad, kunne stå for den formelle opninga av ysteriet her i 2005. Både ho og ei anna erfaren budeie, Ragnhild Lillejordet, var med på ein av dei fyrste produksjonane av Gubb i det nye anlegget.

Askeladdar i verda
Både Åse og Sigurd har gjennomført modulkurs i “Lokal foredling og omsetning med vekt på mjølk” ved Kompetansenavet Vest v/ Sogn Jord- og Hagebrukskule i samarbeid med Norsk Gardsost. Med 12 års erfaring har det blitt fleire ystekurs både hos oss sjølve i eige ysteri, innanlands og studieturar utanlands. Særleg har vi henta inspirasjon frå Frankrike og Sveits. Vi har vore delaktige i utviklingsretta prosessar og eit eventyr som enda ikkje er ute. På denne måten kombinerer vi det beste frå dei lokale tradisjonane med kunnskap om småskala foredling av mjølk frå andre område i Europa.